Сегодня, 21 ноября празднуется Собор Архистратига Михаила и прочих Небесных Сил бесплотных, Архангелов: Гавриила, Рафаила, Уриила, Селафиила, Иегудиила, Варахиила и Иеремиила.
☦Молитвы святым Архангелам Михаилу, Гавриилу, Рафаилу, Уриилу, Селафиилу, Иегудиилу, Варахиилу и Иеремиилу.
Молитва Архистратигу Михаилу
О, святый Михаиле Архангеле, светлообразный и грозный Небесного Царя воеводо! Прежде Страшного Суда ослаби ми покаятися от грехов моих, от сети ловящих избави душу мою и приведи ю к сотворшему ю Богу, седящему на Херувимех, и молися о ней прилежно, да твоим ходатайством послет ю в место покойное. О грозный воеводо Небесных Сил, предстателю всех у Престола Владыки Христа, хранителю твердый всем человеком и мудрый оружниче, крепкий воеводо Небеснаго Царя! Помилуй мя грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольского, и сподоби мя непостыдно предстати Создателю нашему в час страшнаго и праведнаго Суда Его. О всесвятый великий Михаиле Архистратиже! Не презри мене, грешнаго, молящагося тебе о помощи и заступлении твоем, в веце сем и в будущем, но сподоби мя тамо купно с тобою славити Отца и Сына и Святаго Духа во веки веков. Аминь.
Молитва святому Архангелу Гавриилу
О святый великий Архангеле Гаврииле, Божию престолу предстояй и озарением от Божественнаго света осиянный, ведением же непостижимых тайн о превечне премудрости Его просвещенный! Всеусердно молю тя, настави мя к покаянию от злых дел и ко утверждению в вере моей, укрепи и огради душу мою от искушений прельстительных и умоли Создателя нашего о отпущении грехов моих. О святый великий Гаврииле Архангеле! Не презри мене, грешнаго, молящагося тебе о помощи и заступлении твоем в веце сем и в будущем, но присно помощник, мне явися, да непрестанно славлю Отца и Сына и Святаго Духа Державу, и твое предстательство, во веки веков. Аминь.
Молитва святому Архангелу Рафаилу
О святый великий Архангеле Рафаиле престолу Божию предстояй! Ты благодатию, от Всемогущаго Врача душ и телес наших тебе данною, праведнаго мужа Товита от слепоты телесныя исцелил еси и сына его Товию, спутешествующаго ему, от злаго духа сохранил еси. Всеусердно молю тя, буди мне путеводитель в жизни моей, сохрани от всех видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О святый великий Рафаиле Архангеле! Услыши мене, грешнаго, молящагося тебе, и сподоби в здешний и будущей жизни благодарити и славити общаго Создателя нашего в безконечныя веки веков. Аминь.
Молитва святому Архангелу Уриилу
О великий Архистратиже Божий Архангеле Урииле, ты, еси просвещаеши огнем Божественным всех верующих, просвети и меня, мрачнаго грехами, освяти ум мой, и сердце мое, и волю мою, и возбуди прославляти Святую Троицу: Отца и Сына и Святаго Духа, и умоли Благоутробие Божие за грешную мою душу, и избавит меня Господь от всех врагов, видимых и невидимых, и всех бед, скорбей и всякого разноверия, раскола и ересей твоими молитвами, Архангеле Урииле, ныне, и присно, и во веки веков. Аминь.
Молитва святому Архангелу Салафиилу
О великий Архистратиже Божий Архангеле Салафииле, ты приносишь молитвы святых пред лицем Божиим, умоли Его Благоутробие за грешную душу мою, да созиждет Господь сердце чисто и дух правый да обновит во утробе моей; и Духом Святым утвердит к покаянию и молитве, дабы всегда пребывати ми с Богом ныне, и до последнего часа моей жизни, и во веки веков. Аминь.
Святый Архангеле Божий Салафииле! Молитвенниче со всеми Небесными Силами и сугубый ходатаю о усопших, моли Бога о нас и о присных, в успении сущих.
Молитва святому Архангелу Иегудиилу
О великий Архистратиже Божий архангеле Иегудииле, ты еси ревностный защитник славы Божией, ты возбуждаешь прославлять Святую Троицу: Отца и Сына и Святаго Духа, возбуди и меня, лениваго, к покаянию и молитве Господу Богу, и подаст мне Господь дух сокрушенный, и смиренное сердце, и источник слез, и истинное исповедание во грехах моих, и избавит меня Господь от муки вечныя и от злых врагов всегда: ныне, и присно, и во веки веков. Аминь
Молитва святому Архангелу Варахиилу
О великий Архистратиже Божий Архангеле Варахииле, предстоя престолу Божию, и оттуда приносишь благословение Божие в домы рабов Божиих; испроси у Господа милости и благословения на домы наши, на скот наш, на нивы наши, да благословит Господь Бог нас от Сиона и от Горы Святыя Своея, дарует изобилием скот наш и изобилием плодов земных, и подаст нам здравие, и спасение, и помощь, и сподобит Царствия Небеснаго со всеми Святыми, молитвами Пречистыя Владычицы и всех святых Небесных Сил, всегда: ныне, и присно, и во веки веков. Аминь.
